కోడెల తరహాలోనే ‘చింతమనేని’పై కుట్ర

by CNN TELUGU
0 comment


ప్రభుత్వ వేధింపులు తట్టుకోలేక ఆత్మహత్య చేసుకున్న కోడెల శివప్రసాదరావు తరహాలోనే దెందులూరు మాజీ ఎమ్మెల్యే చింతమనేని ప్రభాకర్‌ని అంతం చేసేందుకు కుట్ర జరుగుతోందంటూ టీడీపీ సీనియర్ నేత వర్ల రామయ్య సంచలన ఆరోపణలు చేశారు.

ప్రభుత్వం కక్షసాధింపులకు పాల్పడుతోందని మరో కోడెల మాదిరిగా వేధిస్తున్నారని, చింతమనేనిని లేకుండా చేయాలని కుట్ర చేస్తున్నారని వర్ల రామయ్య ఆరోపించారు. మానవ హక్కుల కమిషన్ కల్పించుకుని ఒక పౌరుడిగా చింతమనేని హక్కులను కాపాడాలని వర్ల కోరారు. జిల్లా అధికారులు అమానుషంగా వ్యవహరిస్తున్నారని ఆగ్రహం వ్యక్తం చేశారు.

పశ్చిమ గోదావరి జిల్లా ఎస్పీ, కలెక్టర్‌ పక్షపాత ధోరణితో వ్యవహరించడం అన్యాయమని ఆక్షేపించారు. చింతమనేనిపై కక్షసాధించేందుకు వైఎస్సార్సీపీ నేతలు అధికారులతో ఒప్పందం చేసుకున్నారన్నారు. అందులో భాగంగానే చింతమనేనిపై వేధింపులని వర్ల తేల్చి చెప్పారు. పోలీసులు, ప్రభుత్వం అధికారులు ఇష్టానుసారం వ్యవహరిస్తే చూస్తూ ఊరుకునేది లేదని వర్ల హెచ్చరించారు. మానవ హక్కుల కమిషన్‌ను ఆశ్రయిస్తామన్నారు.

ప్రభుత్వం ఇలాగే నిరంకుళ వైఖరిని అనుసరిస్తే ప్రజా ఉద్యమాలు వస్తాయని ఆయన హెచ్చరించారు. దళితులను కులం పేరుతో దూషించడంతోపాటు దాడి చేశారంటూ నమోదైన కేసులో చింతమనేని ప్రభాకర్‌ను పోలీసులు అరెస్టు చేసి జైలుకు పంపిన విషయం విదితమే.

Related Posts